RUJI NI ARI DOHOT PAMILANGINA (bag.II)

Horas to my huta

Pamilangi ari dohot pandohoti dipangarujion ari idaon mai sian dasor bilangan ima:

* Ari rojang na tolupulu
* Parmesa na sampuludua
* Panggaroda naualu
* Gorda na onom
* Mamis na lima
* Pehu na opat
* Panjorotan na dua
* Hatiha pungpung si sada-sada

ad_1. Ari rojang na tolupulu.

Ia lapatan ni ari rojang natolupulu, ima tolupulu jujur ni ari dibagasan sada bulan. Diparhalaan, di anak mangoli di boru muli . di anak tubu dohot di boru sorang di angka ulaon sahat tu jomuk-jomuk ni ari.

ad_2. Parmesa na sampuludua.

Parmesana sampuludua, ima bulan na sampuludua manang panggilingan na sampuludua manilik ari si parhorjahononhon mangihuthon sipaha ni bulan (parmesa).

Goar-goar ni parmesa na sampuludua :

1. Mesa (sipaha sada)
2. Marsoba (sipaha dua)
3. Nituna (sipaha tolu)
4. Harahata (sipaha opat)
5. Singa (sipaha lima)
6. Hania (sipaha onom)
7. Tola (sipaha pitu)
8. Martiha (sipaha ualu)
9. Dano (sipaha sia)
10. Mahara (sipaha sampulu)
11. Morhumba (Li )
12. Mena (Hurung )

ad_3. Panggaroda naualu.

Lapatan ni panggaroda naualu, ima jujur ni desa na ualu, di goar-goar ni desa i.

Goar ni desa naualu:

1. Purba (Timur )

2. Anggoni ( Tenggara)

3. Dangsina (Selatan )

4. Nariti (Barat Daya)

5. Pastima (Barat)

6. Manabia ( Barat Laut )

7. Utara (Utara )

8. Irisanna (Timur Laut)

Jotjot do i dipangke datu manilik ari diugasan mago, alatan ni sahit, manjaha manuk diampang dohot angka ulaon namardomu tusi.

ad_4. Gorda na onom.

Goar ni panggorda naonom, angka ondeng ma :

1. Gorda ( onggang, lali )
2. Sorpa (ulok)
3. Sangmusiha (tihus, monsi)
4. Marsoba (lampu-lampu )
5. Sua (asu, babi)
6. Sangbinea (ombun, angin)

Jotjot do i dipangke datu manilik ari laho tu partongtangan dohot na mardomu tusi.

ad_5. Mamis na lima.

Goar ni mamis na lima :

A.

1. Mamis (sogot, mulai poltak mataniari)
2. Hala (pangului, hira-hira pukul sia sahat pukul sampulu sada )
3. Sori (hos, tonga ari )
4. Borma (guling, hira-hira pukul dua sahat tu pukul lima )
5. Bisnu (bot, laho mangholom mataniari )

B.

1. Ina ni tangan (ina ni jari )
2. Situmudu (jari jari paduahon )
3. Situalang (jari partonga–tonga )
4. Sijagoa (jari paopathon )
5. Anak ni tangan (anak ni jari)

Dipangke jahajahaan, dipartubu ni jolma, mangatiha ugasan mago, boa-boa ni sorimatandang songon panggilingan ni parhalaan, ari ni sahit dohot gora (parmusuon) dohot angka na asing.

ad_6. Pehu na opat.

Ia pehu naopat, ima tiang ni desa na ualu (ina ni desa, purba, dangsina, pastima, utara), didok ma i tiang ni desa manang tiang ni tano. Masuk tu torsa-torsa do hata na mandok martiang do tano on, tujuanna dang boi holan gogo ni hata manang torop ni partubu. Adong do sitiop tampuk ni tanoon, ima raja ni huta, horja, dohot raja ni Bius .

ad_7. Panjorotan na dua.

Ia panjorotan na dua ima mata ni ari dohot bulan na manondangi tano on. Jala dipangke do i manjaha partaonan dohot nanaeng masa.

ad_8. Hatiha pungpung si sada-sada.

Ia hatiha pung- pung sisada sada na martujuan tu pusok ni tano on manang pusok ni desa naualu.

(marudut do pe...)