Horas to my huta

9. UMPASA PODA TU HELA DOHOT BORUNA

     Umpasa hata poda dohot pasu-pasu sian parboru tu hela dohot boruna;

Tombak ni Panggabean, Parasaran ni misang.

Sai marsiamin-aminan ma hamu, Songon lampakni pisang.

Sai marsi tungkol-tungkolan,Songon suhat dirobean

Aek sihoru-horu, Ditoruni dolok Martimbang

Rap manimbung ma hamu ia tu toru,

Rap mangangkat ia tu ginjang

Napuran ni Lumbanjulu, tu gambir ni Pahae.

Rap Mangalakka ma hamu ia tu julu,

Rap mangambe ia tu jae.

Tu ho Boru hasian dohononhu ma:

Molo ogungna mabola,

Pintor dipaboa do luhana.

Molo parumaen na marroha,

Pintor dibuatdo rohani simatuana.

Sibigo ambaroba, rara huling-kulingna

Gabe uli do par-rupa na roa,

Asal ma lambok pakkulingna

Angka Umpasa Pasupasu :

Tubu ma sikkoru, dilambung ni tandiang

Sai tibu ma hamu marurat tu toru,

Jala tibu marbulung tu ginjang

Na hinutti hirang, marisi gadong lobutua

Badan muna ma naso sirang, Sahat tuna saurmatua

Tinampul bulung salak, Laos hona bulung singkoru.

Sai tibu ma hamu paabing-abing anak,

Jala tibu mangoppa boru

Horbo ni sibuluan, Manjappal dibalian.

Sai manumpakma dihamu Tuhan,

 Tiur nang passarian.

10. UMPASA DITINGKI TINGKIR TANGGA

Tubu ma singkoru, dibonani Tandiang

Tutu ma namartoddong marsi topot-topotan, 

Songon pidong ilang.

Lam tu dengganna ma ngolu-ngolu,

Jala mokmohan na marniang.

Sinuan lata, nisabi  diladang ni Sitapongan

Doshon sataon do sadari,

Molo so ni-ida nahinaholonga

Tubu hau ingol, di tombak ni Simalungu.

Ala hami nunga masihol,

Ba ro hami marubat lungun

Naeng huhut berengonnami:

Sitolmokdo i ulaning, manangna pusukni tandiang

Mokmok do hela dohot boru nami,

Manang na naung marniang

Ala nunga las rohanami:

Inggir-inggir do hape, parasaran ni satua

Tung hipas do nasida hape, jala soada marhua