Horas to my huta

3. UMPASA TUNA BARU MARBAGAS.

Dangka ni arirang,

Peak di tonga onan,

Badan muna naso jadi sirang,

Tondi mu ma marsigomgoman.

Giring-giringma tu gosta-gosta,

Tu boras ni singkoru,

Sai tibu ma hamu mangiring-iring,

Huhut mangompa-ompa anak dohot boru.

Rimbur ni Pakkat, tu rimbur ni Hotang,

Sai tudia pe hamu mangalakka,

sai tusima hamu dapot pansamotan.

Dengke ni sale-sale, Dengke ni Simamora,

Tamba ni na gabe, Sai tibu ma hamu mamora.

Sahat-sahat ni solu, sahat ma tu labuan,

Sahat ma hamu leleng mangolu,

Jala sai di dongani Tuhan

Sahat solu, sahat di parbinsar ni ari,

Leleng ma hamu mangolu,

Jala di iring-iring Tuhan ganup ari.

Mangula ma pangula, dipasae duhut-duhut

Molo burju marhula-hula,

Dipadao mara marsundut-sundut.

Ruma ijuk, tu ruma gorga,

Sai tubu ma anakmuna na bisuk,

Dohot borumuna na lambok marroha.

Gadu-gadu ni Silindung,

Tu gadu-gadu ni Sipoholon,

Sai tubuma dihamu anak 17, dohot boru 16.

Andor hadukka ma, patogu-togu lombu,

Sai sarimatua ma hamu,

sahat tu na patogu-togu pahoppu.

4. UMPASA MANGAMPU

Bulung ni Taen, Tu bulung ni Tulan,

Ba molo tarbahen, Sai topot hamu hami sahali sabulan.

Molo so boi bulung ni tulan, Pinomat bulung ni salaon,

Ba molo so boi sahali sabulan, Pinomat sahali sataon.

Ni durung si Tuma, laos dapot Pora-pora.

Molo mamasu-masu hula-hula mangido sian Tuhan,

Napogos hian iba, boi do gabe mamora.

Songgop si Ruba-ruba tu dakka ni Hapadan,

Angka pasu-pasu na ni lehon muna,

Sai dijangkon tondi ma dohot badan.

Mardakka Jabi-jabi, marbulung ia si Tulan

Angka pasu-pasu na pinasahat muna,

Sai sude mai dipasaut Tuhan.

Naung sampulu sada, jumadi sampulu tolu,

Angka pasu-pasu pinasahat muna,

Sai anggiatma padenggan ngolu-ngolu.

Naung sapulu pitu, jumadi sapulu ualu,

Angka pasu-pasu pinasat muna hula-hula nami,

Diampu hami ma di tonga jabu.

Turtu ma ninna anduhur, Tio ma ninna lote,

Angka pasu-pasu pinasahat muna

Sai unang ma muba, unang mose.

Tutuma inna pidong sibigo, paihut-ihut bulan,

Saluhut angka na tapangido,

Sai tibu ma dipasaut Tuhan.

Obuk do jambulan, nidandan ni boru Samara

Pasu-pasu na mardongan tangiang sian hula-hula,

Mambahen marsundut-sundut soada mara.

Tinapu bulung, nisabi baen lompan ni pangula

Sahat ma pasu-pasu na nilehon muna i tu hami,

Sai horas ma nang hamu hula-hula.

Suman tu aek natio do hamu,

Riong-riong di pinggan pasu,

Hula-hula nabasado hamu, Nagirgir mamasu-masu.