Ue Rohaku, Pos Ma Ho Tontong II

Horas to my huta

Uli jala denggan, posi jala rahis, gabe mambahen sidangolon natarlobi, atik pe roha mardongan gok las ni roha, alai marsampur dohot jut ni roha.

Da targoar ma naung gabe bangso nabalga, bangsoki Bangso Batak Najogi. Naung tarbarita ro di liat desa naualu, ro di sundut ni portibi. Alai luhutna I magopo tarsongon natarloppo, so ada guna, so ada laba, ai nunga gabe tarbondut ni tingki siala tarlalap di sihalalapan.
Ai gabe tarsongon nasai sonang ngoluna umbahen hamujon ni zaman. Gabe lupa ma angka sipaingot, laos tarlaosi ma angka poda nauli. Hapistaron, hamoraon, ido dibahen gabe dalan mangoto-otoi, dalan masimagoan, jonjong HOTEL (Hosom, Teal, Elat, Late). Masiat tu ngingina luhutna jolma i.

So adong be namandok, “ahu do ho, ho do ahu”. Alai nga jumotjot be sude mandok, “ise ho?”

Targoar ninna Tano Batak nauju I dip eta kemiskinan, alai malungun do pe ahu tu si. Holan di si do jumping ahu, engkel narap mangengkelhon, jala tangis, narap mangandunghon. Mangula marsiadapari, rap sauduran tu dolok tu toruan, tontong sisada tahi, luhutna I di bagas holong mangalap holong sambing. Ia nuaeng holong I, nunga holong namarpambuat, holong namarpanganci. Ia so adong nahubuat, da marisuang do holong i, sai ido namian di roha nuaeng on.

Targoar do uju I, hasipelebeguon, alai malungun do ahu tu si. Atik pe naung gok ugamo nuaeng on, namandok bada tu sihapelebeguon ala targoar “kafir” ulaon sisongon i, alai rohakki jotjot do sai malungun tu tingki i. Ai uju sihapelebeguon do adong jolma nabegu, dung adong ugamo, jolma nabegu-beguon na ma godangan. Ai tingki di sihapelebeguon do masa ruhut-ruhut ni parngoluon mardalan. Dituntun ho lomom, uhum ma adopanmu, alai molo marhata nitta do ho, raja ma ho di ngolum. Ia di tingki nuaeng, uhum nunga gabe tartuhor, gogo na ma nasai dipangasahon.

Ue, hutaki, Tano Batak Nauli. Didia nuaeng haulionmi???

= = = = = = =  == = = = == = = = = = = = = == = = = = = = =