Horas to my huta

19. UMPASA SIAN DONGAN SAHUTA

 

Sambilma tartondong, dapotan ampapaluan

Asa denggan martondong,

Unang masipailaan.

Lupak ni Sigura-gura, denggan do panjalaan

Molo mangido hulahula,

Olat ni na tarbahen ba tinambaan.

Sinuan bulu, sibahen na las.

Sinuan partuturan, sibahen na horas.

Dolok ni pangaloan, hatubuan ni hau toras.

Na masipaolooloan do,

Mambahen gabe jala horas.

Marasar ma binsusur, di ramba di robean.

Asa denggan martutur, naeng ma masipaunean.

Marasar ma binsusur, di ramba di robean.

Asa denggan martutur, naeng ma masipaunean.

Tuat siputi, nangkok sideak.

Ia naumuli, i ma tapareak.

Sumber ; habatakon

  dan Disadur dari berbagai sumber,  raja parhata pada acara adat.

Horas to my huta

18. UMPASA DINAMARHATA SINAMOT 

 

Parboru Panise

Sai jolo dinangnang do, asa dinungnung.

Sai jolo pinangan, do asa sinungkun.

Buruk-buruk ni durung, parasaran ni sioto

Bangkona do manungkun, molo so binoto

Danggur ma danggur barat,

Toho tu duhut-duhut, ditoru ni singkoru

Nungnga bosur hami mangan indahan na las,

Sagat marlompan juhut.

Ba hatana paboa hamu ma raja ni boru.

Sande sige, tu bungkulan ni sopo

Bangkona do manise, molo so binoto

Diama nuaeng langkatna, dia unokna

Dia ma nuaeng hatana, dia nidokna

Paranak

Godang sibutong-butong, otik sipir ni tondi

Tung so sadia pe na hupatupa hami,

Sai pamurnas ma i tu pamatang, saudara to bohi

Habang pidong halo-halo, didongani sitapi-tapi

Las ma rohamu manjalo,

Ai  idope na tarpatupa hami.

Sititikma sigompa, Golang golang pangarahutna,

Tung songon onpe sipanganon natupa dijolontaon,

Sai godangma pinasuna.

Bulungni dapdap langkop

Ba idope na adong,

Ba i ma taparhajop

Parboru

Bagot na marhalto ma, tubu di robean

Horas ma hami na manganhon,

Lam martamba sinadongan di hamu na mangalean

Tubu simarhora-hora, ditopi ni tapian

Sai roma tu hami silas ni roha, Tiur nang pansarian.

Bona ni aek Puli, di dolok Sitapongan

Sai roma tu hamu angka nauli,

Jala sai dor nang pansamotan

Inganan ni puli, di hauma salenggam

Sai marangkupdo nauli,

Mardongando na denggan

Rantingni bulu duri, jait masijaotan

Angkupni hata nauli, Dia ma sitaringotan.

Paranak

Pitu lili nami, Pa ualu jugia nami.

Nauli do nipinami,

Ai dijangkon borumuna do anak nami.

Sapala na mardalani, Unang ma olat ni Sigalangan

Sapala naung mangoloi borumuna,

Unang ma diparalang-alangan.

Sai jalo hamu ma anak nami,

Dongan ni borumuna sapanganan.

Inganan masibulu, dolok ni sitapongan

Barani pe hami manjumpai hamu,

Ndada ala godang ni sinadongan

Barita ni lampedang, mardangka bulung bira

Barita ni burjumu marboru,

Tarbege do ro didia.

Amporik marlipik, onggang marhabang.

Gabe do parboli na otik,

Gabe do nang parboli na godang.

Aek godang tu aek laut,

Dos ni roha sibahen na saut.

Balittangma pagabe, tumundalhon sitandoan

Arinta ma gabe, molo marsipaolo-oloan

Parboru

Pat ni gaja ma tu pat ni roha

Pahompu ni raja do hamu,

Jala anak ni namora.

Tubu bagot di robean, Tubu palia dilambung huta.

Tarbarita do ompumu parompon sisegean,

Jala parpinahan pitu rura

Barita ni lampedang, mardangka bulung bira

Barita ni hamoraon muna, tarbegedo ro didia.

Pitu lili nami, pa ualu jugia nami.

Nauli do nang nipinami,

Ai gohanmuna ma nuaeng hajutnami

Paranak

Madekdek ansoit tongon tu tarumbara

Unang dok hamu hami parholit, Silehonon do soada

Niluluan tandok, hape dapot parindahanan

Tolap pamangan do nian mandok,

Alai ndang tuk jamaon ni tangan

Sai tu ginjang ninna porda,

Sai tu toru do pambarbaran

Sai naeng mamora do nian dipangido roha,

Hape sai hapogoson do dilehon sibaran

Tubu antaladan jonok tutadatada

Hansit do rajanami tangan mandanghurhon na so ada.

Tombak sulu-sulu, parasaran ni haluang.

Hula-hula nabasa do hamu,

Na so mohop mida hepeng.

Parboru

Songgop siruba-ruba, tu dangkani ansoit.

Ai anggo tu hula hula, ndang boi iba mangholit.

Tombak didolok-dolok, hatubuan nisuga suga.

Na mandanggurhon tu dolok do,

Na mangalehon tu hula hula.

Nidurung situma, laos dapot pora pora

Molo buas iba tu hula hula,

Na pogos hian iba, ingkon gabe mamora

Tubu hau toras, di dolok ni Sitapongan.

Ingkon gabe do hita jala horas,

Molo masipaolo oloan.

Duru duru ni huta, panuanan ni salaon.

Pangidoan ni hula hula dao doi juaon.

Horas to my huta

17. UMPASA DITINGKI NA MARUNJUK

Umpasa ditingki na marunjuk sude do angka umpasa na di

namarhata sinamot boi dohonon alai angka on tambana

Tulang ni hela

Bulung na martampuk, bulungni simarlasuna

Nungnga hujalo hami jambar tintin marangkup,

Dohonon ma hata pasupasuna

Hot pe jabu i, tong doi margulang-gulang

Tung sian dia pe mangalap boru bere i,

Tong doi boru ni Tulang.

Sai tong doi lubang, Nangpe dihungkupi rere,

Sai tong doi boru ni Tulang, Manang boru ni ise pei dialap bere.

Laklak diginjang pintu, Singkoru ginolomgoloman

Maranak ma hamu sampulu pitu, Marboru sampulu onom

Urat ni pinasa ma tu urat ni hotang.

Tu dia pe nasida mangalanka,

Ba sai disi ma nasida dapotan.

Horas to my huta

14. UMPASA NI PARBORU DINA MANGULOSI HELANA DOHOT BORUNA

Diginjangdo arirang, ditoru pangonggoman

Badanmunama naso ra sirang,

Tondimuna sai masigomgoman.

Tangki ma jala walang,  Galinggang jala garege

Tubu ma anak partahi jala ulu balang,

Dohot angka boru namora jala pareme

Eme sitambatua, parlinggoman ni siborok

Sai dilehon Amanta Debatama dihamu tua,

Jala sai tongtong ma hamu diparorot

Sahat sahat ni solu, sahat ma tu Tigaras

Saurma hamu leleng mangolu, gabe jala horas

Aek sihoruhoru, tu sampuran Siguragura

Rap leleng ma hamu mangolu,

Sahat tu na saur matua.

Binsar mataniari, poltak matani bulan.

Sai tubu ma dihamu angka boru na malo mancari,

Dohot anak na gabe raja panungkunan.

15. UMPASA NI PARBORU DITINGKI MANGULOSI AMA NI HELA

Dolok ni purbatua, jonok tu Siborotan.

Sai saur ma hamu sarimatua,

Jala tiur nang pansamotan

Tubu ma tambinsu, ditoru ni pinasa

Sai torop ma tubu dihamu angka pahompu,

Nabisuk huhut nauli basa

Hau simartolu, ditombak ni Panamparan

Sai leleng ma hamu mangolu,

Dihaliangi angka pomparan.

Eme na marbiur, dilambungni hariara.

Sai matorop ma pomparan muna,

 Jala maribur huhut matakkang jala manjuara.

16. UMPASA DOHOT HATA PASU-PASU SIAN PARBORU DINA PASAHAT ULOS TUNATORAS BORU NI HELA

Ramba poso dope ito parumaenmi naso tubuan lata

Halak naposo dope parumaenmi, Na so umboto agia aha.

Marmutikma lasiak dompak mataniari

Maloma ho ito manganju parumaenmi,

Arian nang bodari

Andor halumpang ma togutogu ni lombu.

Sai saur matua ma itongku, pairing iring pahompu.

Horas to my huta

13. UMPASA NI DONGAN SAHUTA SIBAGI OLOP-OLOP

Balittang ma pagabe, tumandakkon sitandoan

Saut ma angka ianakkonta i gabe,

Ai nungnga saut hita marsipaolo-oloan.

Aek sihurukhuruk tu silanlan aek Toba.

Ndang adongbe na mar-ungut-ungut,

Nungnga sude hita marlas ni roha

Bintangna rumiris tu ombun na sumorop,

Toho di rondang ni bulan.

Anak pe antong di nasida sai riris,

Boru pe torop, angka si oloi Tuhan

Simbora gukguk, rarak diatas amak

Mamora ma hita, huhut torop ma boru dohot anak

Horas to my huta

12. UMPASA SIDOHONON DITINGKI NA MANGULOSI PENGANTEN

 

Asa Hot Parsaripeon i;

Diginjangdo arirang, ditoru pangonggoman

Badan munama naso ra sirang,

Tondimuna sai masigomgoman.

Giring-giringma tu gostagosta tu borasni singkoru

Sai tibu ma hamu mangiringiring,

Tibu mangompa angka anak dohot boru

Rimbur ni pangkatma tu rimbur ni hotang

Tung aha pe dijama hamu

Sai ima parohon pansamotan

Sahat sahat ni solu, sahatma tu bontean.

Sahatma hamu leleng mangolu,

Sahat tu panggabean.

Asa Gabe;

Mandurung di Aek Natolu, manjala di siguragura

Rap leleng ma hamu mangolu, Sahat tu na saur matua.

Laklak diginjang pintu, Singkoru ginolomgoloman

Maranak ma hamu sampulu pitu, Marboru sampulu onom

Hotang hot-ari tu hotang simarhora-hora

Sai gogo ma hamu mansari, Jala tibu ma hamu mamora.

Sahat-sahat ni solu sahat ma tu Labuan.

Sahat ma hamu leleng mangolu, Sai diiring-iring Tuhan

Asa Sahat sinta-sinta i;

Napuran ni Parsoburan, tu gambir ni Sitapongan

Tangkas ma hamu sai sauduran, Jala sai marsihaholongan

Tubu ma tambinsu di toru ni pinasa.

Sai tubu ma dihamu angka anak na bisuk,

Dohot angka boru na ulibasa.

Andorhas tu andorhis tu andor simartolu

Sai rap horasma hamu rap torkis,

Jala sai dapot ngolu-ngolu

Sahat-sahat ni solu sahat ma tu Labuan.

Sahat ma hamu leleng mangolu, Sai diiring-iring Tuhan

Asa Denggan Pansarian;

Talip pintu tolu, ihot ni ogung oloan.

Rap leleng ma hamu mangolu,

Jala sai satahi saoloan.

Binsar mataniari, poltak matani bulan.

Sai tubu ma dihamu angka boru na malo mancari,

Dohot anak na gabe raja panungkunan.

Bona ni aek Puli, di dolok Sitapongan

Sai roma tu hamu angka nauli,

Jala sai dor nang pansamotan

Sahat sahat ni solu, sahat dirondang ni bulan.

Rap sahat ma hamu leleng mangolu,

Jala rap si oloi Tuhan.

Horas to my huta

11. UMPASA TUNA MAMONGOTI / MAMASUKI JABU

Mardangka bulung bira, Martappuk bulung labu

Mauliatema di Tuhanta, Ai nungnga tipak hamu marjabu.

Tubuma simarlasuna, Lata ni tobu di holang-holangna

Sai hotma jabuntaon dibatuna, Jala togu di hajongjonganna.

Tubuma tandiang, di topi aek Sibara-bara

Sai gokma jolma diginjang, Gok pinahan ma tombara

Alai ala so martombara be jabu nuaeng, on nama dohonon

Marmutikma tabu-tabu, Dompak mataniari.

Gokma jolma di jabu, Jala gokma hepeng di lamari.

Panggu do panggisgis, Pangko ni bagot bahen hauna.

Jabunta onma nasora tiris, Huhut natogu di batuna

Tubu ma salaon, ditopi ambar Sihoru-horu.

Jabu nauli ma jabuntaon,

Hatubuan ni anak dohot boru.

Duru ni hauma, panuanan ni sangge-sangge.

Sahat ma hamu saurmatua mangingani jabunta on,

Huhut horas jala gabe

Andorras ma tu andorris, Tu andor ni Purbatua

Sai horas ma hamu, Sai torkis mangingani jabunta on,

Gabe jala saurmatua.